Qassutit

Qassutit assigiinngitsut. 

Aalisakkanut qassutit tunngaviusumik assigiinngitsunut marlunnut avinneqarsinnaapput, tassalu qassutit kivisittakkat, puttasuttullu.

Taakkulu arlaat qinerneqarsinnaapput aalisakkat sorliit piniarnissaat apeqqutaatillugu.

Qassutit kivisittakkat aalisakkanut natersiornerusunut, imaluunniit immap naqqanut qaninnerusumittartunut atorneqartarput, soorlu qaleralinnut saarullinnullu.

Qassutit puttasuttut puttaqutitalinnik qimissersugaasarput, taamaasillutik immap qaavaniit ammut nivigasarlutik, taakkulu aalisakkanut immap qaavata qanittuaniittunut atugassiaanerusarput, soorlu eqalunnut kapisilinnulluunniit. 

Qassutit kivisittakkat.

Qassutit kivisittakkat immap naqqaniittussiaasarput, uiuleriinneqarsinnaasarlutik. Isuisigut kisaaserneqartarput, taavalu isuisigut illuttut aamma puttaquserneqartarlutik.

Qassutit puttasuttut.

Qassutit immap qaani puttasutut atugassiat, amerlanertigut nunamut pituutserlugit, avataasigullu kisaaserlugit, imaluunniit illuttut kisaaserlugit atorneqartarput.

Kiisalu aamma tissukartutut atugassat kisaaserneqarneq-ajorput, kisiannili erfalasortalinnik ,qullilinnik radarreflektorilinnillu napparuserlugit nalunaaqutserneqartarput, angallattunit allaniit takujuminartunngortillugit.